នៅព្រឹកថ្ងៃទី 28 ខែកញ្ញាឆ្នាំ 2022 ឯកឧត្តមគីមរិទ្ធីអភិបាលនៃគណៈអភិបាលខេត្តបានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកវគ្គបណ្តុះបណ្តាល ស្តីពីការគ្រប់គ្រងសហគមន៍តំបន់ការពារ ធម្មជាតិ ដល់ក្រុមប្រឹក្សាឃុំ/សង្កាត់ នៅ ខេត្តព្រះវិហារ ដោយមានការចូលរួមពីមេបញ្ជាការកងរាជអាវុធហត្ថខេត្ត លោកលោកស្រីប្រធានមន្ទីរអង្គភាពពាក់ព័ន្ធ។និងមេឃុំចៅសង្កាត់ជាច្រើនរូបនៅសាលប្រជុំភោជនីយដ្ឋានលីហួត ក្រុងព្រះវិហារ ។
មានប្រសាសន៍នាឱកាសនោះ ឯកឧត្តម គីម រិទ្ធី អភិបាលខេត្ត ថា វគ្គបណ្តុះបណ្តាល ស្តីពីការគ្រប់គ្រងសហគមន៍តំបន់ការពារធម្មជាតិ ដល់ក្រុមប្រឹក្សាឃុំ/សង្កាត់ នៅខេត្តព្រះវិហារ នាពេលនេះ ពិតជាបានចូលរួមចំណែកយ៉ាងសំខាន់ក្នុងការបង្កើនការយល់ដឹងដល់ក្រុម ប្រឹក្សាឃុំ/សង្កាត់ ទាំងអស់ឱ្យមានសមត្ថភាពគ្រប់គ្រាន់ ក្នុងការសម្របសម្រួលការងារសហគមន៍តំបន់ការពារ ធម្មជាតិ ស្របតាមគោលនយោបាយរបស់រាជរដ្ឋាភិបាល សំដៅលើកកម្ពស់ជីវភាពប្រជាសហគមន៍តំបន់ ការពារធម្មជាតិ។
ឯកឧត្តមបន្តថា ការរៀបចំបង្កើតសហគមន៍តំបន់ការពារធម្មជាតិ គឺជាសកម្មភាពមួយដែលបាននឹងកំពុងអនុវត្តស្របទៅតាមគោលនយោបាយរបស់រាជរដ្ឋាភិបាល និងច្បាប់ស្តីពីតំបន់ការពារធម្មជាតិ ក្នុងគោលដៅផ្តល់សិទ្ធិដល់ប្រជាសហគមន៍មូលដ្ឋាន ក្នុងការចូលរួមគ្រប់គ្រង និងប្រើប្រាស់ធនធានធម្មជាតិ បម្រើសេចក្តីត្រូវការក្នុងជីវភាពរស់នៅប្រចាំថ្ងៃ ជាពិសេសចំពោះបងប្អូនរស់នៅក្បែរ និងក្នុងតំបន់ការពារធម្មជាតិ ដែលមានជីវភាពរស់នៅពឹងអាស្រ័យលើធនធានធម្មជាតិ។ លើសពីនេះទៀត ការរៀបចំបង្កើតសហគមន៍តំបន់ការពារធម្មជាតិ គឺជាសកម្មភាពមួយក្នុងការថែរក្សានូវធនធានព្រៃឈើ ដើម្បីរួមចំណែកកាត់បន្ថយនូវការប្រែប្រួលអាកាសធាតុ ដែលកំពុងកើតមានជាសកល។ ដើម្បីបង្កើនប្រសិទ្ធភាពនៃការគ្រប់គ្រងសហគមន៍ ក៏ដូចជាការអនុវត្តន៍គោលនយោបាយវិសហមជ្ឈការរបស់រាជរដ្ឋាភិបាលកម្ពុជា ក្រសួងបរិស្ថានបានធ្វើប្រតិភូកម្មមុខងារ នៃការគ្រប់គ្រងសហគមន៍តំបន់ការពារធម្មជាតិ ជូនរដ្ឋបាលឃុំ/សង្កាត់ ដែលមានសហគមន៍តំបន់ការពារធម្មជាតិ តាមរយៈប្រកាសលេខ ០៣៧ ប្រក ប.ស្ថ ស្តីពីការធ្វើប្រតិភូកម្មមុខងារ “ការគ្រប់គ្រងសហគមន៍តំបន់ការពារធម្មជាតិ” ជូនរដ្ឋបាលឃុំ/សង្កាត់ ដែលមានសហគមន៍តំបន់ការពារធម្មជាតិ ចុះថ្ងៃទី១០ ខែកុម្ភៈ ឆ្នាំ២០១៦ ផងដែរ។
ជាចុងក្រោយឯកឧត្តមក្នុងនាមថ្នាក់ដឹកនាំនៃគណៈអភិបាលខេត្តព្រះវិហារ មន្ត្រីរាជការ កងកម្លាំងប្រដាប់អាវុធ និងក្នុងនាមខ្លួនខ្ញុំផ្ទាល់ ខ្ញុំសូមប្តេជ្ញាគាំទ្រគោលនយោបាយរបស់រាជរដ្ឋាភិបាល លើការលើកកម្ពស់ជីវភាពរស់នៅរបស់សហគមន៍ និងកិច្ចការអភិរក្សធនធានធម្មជាតិ។ ឆ្លៀតក្នុងឱកាសនេះ ខ្ញុំសូមធ្វើការផ្តាំផ្ញើរដល់ លោក/លោកស្រី ជាក្រុមប្រឹក្សាឃុំ/សង្កាត់ទាំងអស់ ត្រូវយកចិត្តទុកដាក់អនុវត្តន៍តួនាទីភារកិច្ចរបស់ខ្លួន ដែល រាជរដ្ឋាភិបាលប្រគល់ជូនឱ្យមានប្រសិទ្ធភាព រួមទាំងការងារគ្រប់គ្រង និងការសម្របសម្រួលសហគមន៍តំបន់ការពារធម្មជាតិ ដែលមាននៅក្នុងមូលដ្ឋានរបស់ខ្លួនផងដែរ។
សូមបញ្ជាក់ថា តំបន់ការពារធម្មជាតិៈ ខេត្តព្រះវិហារមានតំបន់ការពារធម្មជាតិ ដែលស្ថិតនៅក្រោមការគ្រប់គ្រង ដោយមន្ទីរបរិស្ថានខេត្តចំនួន ១០កន្លែង លើផ្ទៃដីសរុបចំនួន ៩៦៥.៨៨២ហិកតា ដោយក្នុងនោះមាន តំបន់ការពារធម្មជាតិចំនួន ០៩កន្លែង គ្របដណ្តប់លើផ្ទៃដីទំហំ ៧៧៤.៥៦៩ហិកតា និងតំបន់របៀង អភិរក្សជីវៈចម្រុះ “ឧត្តរ” ចំនួន០១កន្លែង គ្របដណ្តប់លើផ្ទៃដីទំហំ ១៩១.៣១៣ហិកតា។
